Honourable Chief Election Commissioner of Pakistan, Mr. Sikandar Sultan Raja, is present as a special observer for the ongoing parliamentary elections in Uzbekistan (urdu)

الیکشن کمیشن آف پاکستان

پریس ریلیز
27 اکتوبر 2024

ازبکستان میں جاری پارلیمانی انتخابات کے موقع پر پاکستان کے  چیف الیکشن کمشنر، جناب سکندر سلطان راجہ خصوصی مبصر کے طور پر موجود ہیں۔ انتخابی عمل کے مشاہدے کے دوران آج انہوں نے ازبکستان کے مرکزی الیکشن کمیشن کے چیئرمین محترم نظام خواجہ یف زین الدین مخماتوویچ سے اہم ملاقات کی۔ جس میں دونوں ممالک کے درمیان انتخابی تجربات کے تبادلے کے حوالے سے تفصیلی گفتگو ہوئی۔ دونوں رہنماؤں نے باہمی تعاون کو مزید فروغ دینے پر اتفاق کیا۔چیف الیکشن کمشنر پاکستان نے تاشقند شہر میں واقع مختلف پولنگ اسٹیشنز کا دورہ کیا، جہاں انہوں نے انتخابی عمل کا براہ راست مشاہدہ کیا۔ انہوں نے ووٹرز کی سہولت کے لیے کیے گئے انتظامات کو سراہا اور پولنگ عملے کی کارکردگی کو قابل تعریف قرار دیا۔اپنے دورے کے دوران جناب سکندر سلطان راجہ نے ازبکستان کی نامور تعلیمی درسگاہ،تاشقند یونیورسٹی آف جرنلزم اینڈ ماس کمیونیکیشنز کا خصوصی دورہ بھی کیا۔ اس موقع پر انہیں جدید تعلیمی سہولیات اور میڈیا لیبز سے متعلق تفصیلی بریفنگ دی گئی۔ گزشتہ روز، چیف الیکشن کمشنر صاحب نے ازبکستان الیکشن کمیشن کے زیر اہتمام منعقدہ ایک اہم بریفنگ میں شرکت کی، جس میں دنیا بھر سے تشریف لائے ہوئے مختلف ممالک کے الیکشن کمیشنز کے چیئرمین موجود تھے۔ اس بریفنگ میں ازبکستان کے انتخابی نظام، قانونی فریم ورک اور انتخابات کے انعقاد کے لیے کیے گئے انتظامات کے بارے میں تفصیلی معلومات فراہم کی گئیں۔

ترجمان الیکشن کمیشن